”Монгол Улсын Үндсэн хуулийн өдөр"-т зориулсан шатар сонирхогчдын улсын аварга шалгаруулах шигшээ тэмцээн эхэллээ.
14 дэх удаагаа болж буй тус тэмцээнд 5800 шатарчин оролцсоноос, шигшээ тэмцээнд эрэгтэй 108, эмэгтэй 40, нийт 148 шатарчин шалгарч тунаж үлдээд байна. Анхан шатны сум, дүүргийн аварга шалгаруулах тэмцээн 2025 оны арван хоёрдугаар сарын 06-07-нд, хагас шигшээ буюу аймаг, нийслэлийн аварга шалгаруулах тэмцээн 20-21-нд болжээ.
Монгол Улсын Ерөнхий сайд Г.Занданшатар шигшээ тэмцээний нээлтэд оролцож, үг хэлэхдээ "Монгол Улсын Засгийн газар, Монголын шатрын холбооноос оюуны спортыг түгээн дэлгэрүүлэхэд онцгой анхаарч байна. Шатар сонирхогч хүүхэд, залуусын тоо нэмэгдэж байна. Цаашид шатрын сургалтыг боловсролын хөтөлбөрт багтааж, хүүхдийн сэтгэхүй, оюуны хөгжлийг дэмжих бодлого хэрэгжүүлэхээр зорьж байна" гэлээ.
Шатар сонирхогчдын улсын аварга шалгаруулах анхны тэмцээнд 50 орчим шатарчин оролцож байсан бол өдгөө цар хүрээ нь өргөжиж, оролцогчдын тоо тогтмол нэмэгдэж байна.
Энэ тэмцээнд 1800-2000 хүртэлх чансаатай, цол аваагүй 25-аас дээш насны шатарчид оролцох дүрэмтэй. Амжилт гаргаж, эхний гурван байрт шалгарсан шатарчдад Спортын дэд мастер цол олгодог, 14 жилийн хугацаанд 26 шатарчин улсын цолтой болжээ.
