Монгол Улсын Ерөнхий сайд Ч.Сайханбилэг Ази, Европын Сангийн сайд нарын уулзалтад оролцож буй Европын комиссын Дэд Ерөнхийлөгч бөгөөд Европын холбооны евро, нийгмийн яриа хэлэлцээний асуудал хариуцсан комиссар Валдис Домбровскисийг өнөөдөр (2016.6.10) хүлээн авч уулзан Монгол Улс, Европын холбооны хамтын ажиллагааны асуудлаар санал солилцлоо.
Ирэх 7 дугаар сард манай нийслэлд болох АСЕМ-ийн дээд хэмжээний уулзалт, түүний хүрээнд энэ өдрүүдэд чуулж байгаа хоёр тивийн Сангийн сайд нарын уулзалтыг сайтар бэлтгэлтэй, өндөр түвшинд зохион байгуулахыг Монгол Улсын Засгийн газар нэр төрийн хэрэг гэж үзэж байгааг Ерөнхий сайд уулзалтын эхэнд тэмдэглэлээ.
Ноён Валдис Домбровскис Сангийн сайд нарын уулзалтад Европын холбооноос төлөөлөгч урьсанд талархал илэрхийлээд АСЕМ-ийн дээд хэмжээний уулзалтад Европын холбоо дээд түвшинд төлөөлөгч оролцуулахыг нотоллоо.
Европын холбооны гишүүн орнууд Монгол Улсын жинтэй хөрөнгө оруулагчид болохыг Ерөнхий сайд онцлоод манай улс цаашид эрчим хүч, ялангуяа сэргээгдэх эрчим хүч, хөдөө аж ахуй, мэдээллийн технологи, дэд бүтцийн салбарт хамтын ажиллагаагаа гүнзгийрүүлж, Европын шилдэг технологи, ноу хау, евро стандартыг нэвтрүүлэхэд илүү анхаарна гэлээ.
Дээрх салбарт Монгол Улс, Европын холбооны үр ашигтай түншлэл, хэлхээ холбоог эрчимжүүлэх боломжтойг Европын комиссын Дэд Ерөнхийлөгч тэмдэглэв.
Европын Холбоо нь Монгол Улсын томоохон хөрөнгө оруулагч юм.1990 оноос 2015 оныг дуустал манай улсад Европын Холбооны гишүүн орнуудаас нийт 835 компанийн 5.7 тэрбум ам.долларын хөрөнгө оруулалт бүртгэгдээд байна.
Монгол Улс Европын Холбооны GSP+ тарифын хөнгөлөлтөд 2005 оноос хойш хамрагдан 7200 орчим нэр төрлийн бараа бүтээгдэхүүнийг Европын зах зээлд татваргүй нийлүүлэх давуу боломж эдэлдэг юм гэж Засгийн газрын Хэвлэл мэдээлэл, олон нийттэй харилцах алба мэдээлэв.
